Andhiyaar

Aandhiyan chahein uthao,
Bijliyan chahein girao,
Zal gaya hai deep to andhiyar dhal kar hi rahega.
(1)
Roshni poonji nahi hai, jo tizori mai samaye,
Wah khillona bhi na, jiska daam har grahak lagaye,
Wah pasine ki hansi hai, wah sahidon ki umar hai,
Jo naya suraj ugaye jab tadap kar jhil milaye,
Ugg rahi lau ko na tonko,
Jyoti ke rath ko na roko,
Yeh subah ka doot har andhere ko nigal kar hi rahega,
Zal gaya hai deep to andhiyaar dhal ke hi rahega.
(2)
Hai jawani to hawa har ek ghoonghat kholti hai,
Tonk do to aandhiyon ki boli bolti hai,
Woh nahi kanoon jaane, woh nahi pratibandh manne,
Woh pahadiyon par badliyon si uchalti dolti hai,
Zal chandhi ka lapeto,
Khoon ka sauda sameto,
Aadmi har qaid se bahar nikal kar hi rahega,
Zal gaya hai deep to andhiyaar dhal kar hi rahega.
(3)
Waqt ko jisne nahi samjha use mitna pada hai,
Bach gaya talwar se to phool se katna pada hai,
Kyo na kitni hi badi ho, kyo na kitni hi kathin ho,
Har nadi ki raah se chattan ko hatna hi pada hai,
Uss subah se dosti kar lo,
Har kiran ki maang bhar lo,
Hai jaga insaan to mausam badal kar hi rahega,
Zal gaya hai deep to andhiyaar dhal kar hi rahega.